ຫວຽດນາມ ແລະ ກຳປູເຈຍ ເພີ່ມທະວີການຮ່ວມມື
ຮອບດ້ານເພື່ອຊຸກຍູ້ການເຊື່ອມຕໍ່ເສດຖະກິດ
ຕາມຂ່າວສານຊິນຮວາລາຍງານວັນທີ 21 ມີນາ ນີ້ວ່າ: ທ່ານ ບຸ່ຍແທັງເຊີນ ລັດຖະມົນຕີການຕ່າງ ປະເທດຫວຽດນາມ ແລະ ທ່ານ ປຣາກ ໂຊກອນ ຮອງ ນາຍົກລັດຖະມົນຕີ, ລັດຖະມົນຕີການຕ່າງປະ ເທດ ແລະ ການຮ່ວມມືສາກົນ ກຳປູເຈຍ ເປັນປະທານຮ່ວມກອງປະຊຸມຄັ້ງທີ 20 ຂອງຄະນະກຳມະ ການປະ ສົມ ຫວຽດນາມ-ກຳປູເຈຍ ກ່ຽວກັບການຮ່ວມມືດ້ານເສດຖະກິດ. ໂດຍໄດ້ຮັບຄຳເຊື້ອເຊີນຂອງລັດຖະມົນຕີການຕ່າງປະເທດ ຫວຽດນາມ, ທ່ານ ປຣາກ ໂຊກອນ, ຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ແລະ ການຮ່ວມມືສາກົນ ກຳປູເຈຍ ໄດ້ມາຢ້ຽມຢາມ ຫວຽດນາມ ຢ່າງເປັນທາງການ ແລະ ເປັນປະທານຮ່ວມກອງປະຊຸມຄັ້ງທີ 20 ຂອງຄະນະກຳມະການປະສົມ ຫວຽດ ນາມ-ກຳປູເຈຍ ແລະ ຮ່ວມມືເສດຖະກິດ, ວັດທະນະທຳ, ວິທະຍາສາດ ແລະ ເຕັກນິກແຕ່ວັນທີ 21-22 ມີນາ. ດັ່ງນັ້ນ, ທັງສອງຝ່າຍເຫັນດີເປັນເອກະພາບສືບຕໍ່ຮັກສາການແລກປ່ຽນ, ທາບທາມຄວາມເຫັນຂັ້ນສູງ ແລະ ບັນດາກົນໄກສອງຝ່າຍ; ເພີ່ມທະວີການຮ່ວມມືປ້ອງກັນຊາດ, ປ້ອງກັນຄວາມສະຫງົບ, ຊຸກຍູ້ແຮງການເຊື່ອມຕໍ່ລະຫວ່າງ 2 ພື້ນຖານເສດຖະກິດ, ສືບຕໍ່ ເສີມຂະຫຍາຍທ່າເຕີບໂຕການຄ້າ, ການລົງທຶນສອງຝ່າຍ. ນອກນັ້ນ, ສອງຝ່າຍກໍ່ຍັງເຫັນດີເປັນເອກະພາບເພີ່ມທະວີການຮ່ວມມືໃນບັນດາຂົງເຂດ ເຊື່ອມ ຕໍ່ຄົມມະນາຄົມ, ການທ່ອງທ່ຽວ, ກະສິກຳ-ປ່າໄມ້-ການປະມົງ, ໂທລະຄົມມະນາຄົມ ແລະ ເຕັກໂນໂລຊີຂໍ້ມູນຂ່າວສານ, ແຮງງານ, ຊັບພະຍາກອນທຳມະ ຊາດ ແລະ ສິ່ງແວດລ້ອມໃຫ້ດີຂຶ້ນກວ່າເກົ່າອີກ. ການພົບປະເຈລະຈາ, ທ່ານ ບຸ່ຍແທັງເຊີນ ລັດຖະມົນຕີການຕ່າງປະເທດຫວຽດນາມ ແລະ ທ່ານຮອງ ນາຍົກລັດຖະມົນຕີ, ລັດຖະມົນຕີການຕ່າງປະເທດ ແລະ ຮ່ວມມືສາກົນ ກຳປູເຈຍ ເຫັນດີເປັນເອກະພາບ ຊຸກຍູ້ວຽກງານປັກຫຼັກໝາຍຊາຍແດນ. ກ່ຽວ ກັບບັນຫາທະເລຕາເວັນອອກ, ສອງຝ່າຍ ເຫັນດີເປັນເອກະພາບ ຢືນຢັນຄວາມສຳຄັນຂອງເລື່ອງຮັກສາສັນຕິພາບ, ຄວາມສະຫງົບ, ສະຖຽນລະພາບຢູ່ ພາກພື້ນ, ຮັບປະກັນຄວາມເສລີ ແລະ ຄວາມປອດໄພການເດີນເຮືອ, ການບິນ, ແກ້ໄຂບັນດາການຂັດແຍ້ງກັນໂດຍສັນຕິວິທີ, ບົນພື້ນຖານກົດໝາຍ ສາກົນ ແລະ ສົນທິສັນຍາ ກ່ຽວກັບກົດໝາຍວ່າດ້ວຍທະເລ ປີ 1982 (UNCLOS 1982), ປະຕິບັດຖະແຫຼງການກ່ຽວກັບການປະພຶດຂອງບັນດາຝ່າຍ ຢູ່ທະເລຕາເວັນອອກ (DOC) ຢ່າງຄົບຖ້ວນ, ສູ້ຊົນບັນລຸກົດແຫ່ງການປະພຶດຢູ່ທະເລຕາເວັນອອກ (COC) ຢ່າງມີປະສິດທິຜົນ, ແທດຈິງ ແລະ ສອດ ຄ່ອງກັບກົດໝາຍສາກົນ.
ແຫຼ່ງທີ່ມາ: ໜັງສືພິມກອງທັບ
ວັນທີ 27/03/2023